ელეგანტური სილუეტი, პატარა შავი კაბა, ხელში სიგარეტი, თვალებში კი იდუმალება, რას უნდა ველოდოთ ასეთი ქალისგან? შესაძლებელია ის მსოფლიოში ყველაზე ცუდი ადამიანი იყოს?
2021 წლის კანის კინოფესტივალზე, ქალის როლის საუკეთესო შემსრულებლის, რენატე რეინსვეს გმირი, 30 წლის ჯული, საკუთარ მომავალზე ფიქრში გამუდმებით იკარგება. ლამაზი, ინტელექტუალი, შრომისმოყვარე გოგო მთელი არსებით ცდილობს მსოფლიოში საკუთარი ადგილი იპოვოს, გაერკვეს რა არის მისი ცხოვრებისეული მოწოდება და როგორ ადამიანთან ერთად სურს ცხოვრება, თუმცა როგორც მისი შეყვარებული აქსელი აღნიშნავს, ჯული რაღაცას ელოდება, მაგრამ თავადაც არ იცის რას.
იოჰამ ტრიერის ნორვეგიული სურათის გარშემო კინოკრიტიკოსთა მოსაზრებები ორად გაიყო, თუ ერთი მათგანი ფილმს არაფრისმომცემს და ბანალურს უწოდებს, მეორე ნაწილის მოსაზრებით „ყველაზე ცუდი ადამიანი მსოფლიოში“ გასული წლის ერთ-ერთი საუკეთესო კინოპროდუქტია, რომელიც მაყურებლისთვის ნამდვილ საჩუქრადაც კი იქცა.
იოჰამ ტრიერის რეჟისორული თხრობა თავისუფალია, პერსონაჟების სიღრმისეული კვლევის პარალელურად მუდმივად იცვლება ფილმის ჟანრობრიობაც, ჩვენ წინაშე ხან კომედია, ხან დრამა, ხანაც კი მელოდრამა იშლება.
ნორვეგიული სურათი ახალგაზრდული სულისკვეთებით გამოირჩევა, მეამბოხე ბუნებით და ცოტაოდენი სიმსუბუქითაც, თუმცა ფილმის მთავარი გმირები თინეიჯერები აღარ არიან. „ყველაზე ცუდი ადამიანი მსოფლიოში“ დელიკატურად აღწერს თანამედროვე ნორვეგიელი ქალისა და მამაკაცის ცხოვრების რთულ მდგომარეობას, რომელიც მოწესრიგებული ოსლოს ქუჩებში ზედმეტად კონტრასტულად ვითარდება.
რას ელოდება ცხოვრებაში რომელიმე ჩვენგანი? იოჰამ ტრიერის მელოდრამა პერსონაჟების სიღრმისეული შესწავლით გამოირჩევა და ამ მოლოდინსაც თავისუფალი თხრობის მანერით გვიყვება. ჯული, რომლის გარშემოც მთელი სიუჟეტი ვითარდება, ინტერესებისა და ცრურწმენების მორევშია ჩაკარგული. კარიერული მისწრაფებებისა და შვილების ყოლის ორაზროვანი სურვილი მთავარ პერსონაჟს საშუალებას არ აძლევს ცხოვრების ერთ ასპექტზე ორიენტირდეს და მომავლისკენ დამაჯერებელი ნაბიჯები გადადგას.
„ყველაზე ცუდი ადამიანი მსოფლიოში“ ოსკარის დაჯილდოების ცერემონიაზე ორ მთავარ ნომინაციაში - წლის საუკეთესო უცხოენოვანი ფილმი და წლის საუკეთესო სცენარის კატეგორიაში იბრძოლებს, არის თუ არა ჯული მსოფლიოში ყველაზე ცუდი ადამიანი? - ამ კითხვაზე პასუხის გაცემას კი მხოლოდ ნორვეგიული სურათის ნახვის შემდეგ შეძლებთ.
Academy Museum-ში გამართულ კინემატოგრაფიის დღესასწაულის ფონზე გაშლილი წითელი ხალიჩა კაშკაშა ვარსკვლავებმა დაიპყრეს. ერთად გადავავლოთ თვალი ჰოლივუდის გამორჩეული სახეების ავანგარდულ, გლამურულ თუ სადა და ელეგანტურ ლუქებს.
ფილმი, რომელშიც მთავარ როლებს ჩენინგ ტატუმი და ნაომი აკი ასრულებენ, აგვისტოში გამოვიდა, თუმცა პოპულარობა P. Diddy-ს სკანდალის ფონზე მოიპოვა. სოციალურ ქსელებში რეპერსა და ჩენინგ ტატუმის პერსონაჟ, სლეითერ კინგს შორის ავლებენ პარალელს.
გოგონებო, პრინცესას კაბები მოამზადეთ, დედოფალი მია თერმოპოლისი მალე ისევ ეწვევა თავის სამეფოს. უკვე დიდი ხანია ვიცით, „პრინცესას დღიურები“ ტრილოგიით ბრუნდება, თუმცა არ იყო ცნობილი ვიხილავდით თუ არა მასში ენ ჰეთევეის. რამდენიმე დღის წინ კი, მსახიობმა თავად გაგვიზიარა ემოციები მესამე ნაწილში მონაწილეობის შესახებ.
