ქართველმა დიზაინერებმა, ანი ცინცქილაძემ (Blikvanger) და თამარ დავითნიძემ (Individi), მერსედეს-ბენცის აზერბაიჯანის მოდის კვირეულზე ერთობლივი კოლექცია წარადგინეს. როგორც თავად ამბობენ, ამ ჩვენებაზე ერთად მუშაობა ნდობასა და პროფესიულ პატივისცემაზე დაფუძნებული თანამშრომლობის მაგალითია.
„ამ პროცესში იბადება ისეთი რამ, რაც სცილდება მხოლოდ „ჩემს“ ან „შენს“ კოლექციას და იქმნება ახალი პლატფორმა, ახალი ხმა“, – აღნიშნავენ დიზაინერები.
კვირეულისთვის შექმნილი კოლექცია მთლიანობაში 43 ლუქს მოიცავდა. მისი სტრუქტურა ვიზუალურ ნარატივზე იყო აგებული – დიზაინები ზამთრის მძიმე ტექსტურებიდან ნელ-ნელა გაზაფხულისა და ზაფხულის მსუბუქ, გამჭვირვალე მატერიებზე გადადიოდა. პოდიუმზე მოდელებმა მხოლოდ 2025 წლის გაზაფხული/ზაფხულის ლუქები მოირგეს, ხოლო ზამთრის სამოსი შოურუმში იყო წარმოდგენილი.
ჩვენების მთავარი იდეა დიალოგი და განსხვავებული იდენტობების შერწყმა გახლდათ. პოდიუმზე INDIVIDI-ს მკვეთრად სტრუქტურირებული ფორმები BLIKVANGER-ის კონცეპტუალურ მიდგომას ხვდებოდა. მიუხედავად ბრენდების განსხვავებული ესთეტიკისა, კოლექციამ ერთიანობა მაინც შეინარჩუნა, რადგან ორივე ბრენდის მიერ წარმოდგენილი სამოსი მთავარ თემას „ქალის ბუნების ცვლილება დროში“ ეფუძნებოდა.
BLIKVANGER კონცეპტუალური მონობრენდია, რომელიც 2016 წლიდან ტანსაცმელსა და აქსესუარებს ქმნის. INDIVIDI კი თავისი მკვეთრი სილუეტებითა და თანამედროვე დიზაინით არის ცნობილი. ორივე ბრენდი უპირატესობას ეკომეგობრულ წარმოების მეთოდებს ანიჭებს. ბრენდებს თანამშრომლობის გამოცდილება მანამდეც ჰქონდათ, თუმცა ამჯერად დიზაინერებმა გადაწყვიტეს, თავიანთი განსხვავებული ხედვები სრულად გაეერთიანებინათ, ერთიანი ძალებით შეექმნათ და შემდეგ საერთო სცენაზე წარედგინათ ორივე ბრენდის იდენტობის გამომხატველი კოლექცია.
„ბრენდების თანამშრომლობა არის შესაძლებლობა და არა კონკურენცია. კოლაბორაცია მოდის ის განზომილებაა, სადაც ერთმანეთს ვავსებთ და არა ვანაცვლებთ“, – აღნიშნავენ დიზაინერები.
ქართველი დიზაინერები აზერბაიჯანის მოდის კვირეულზე სხვადასხვა სახით იყვნენ წარმოდგენილები, თუმცა პოდიუმი მხოლოდ BLIKVANGER x INDIVIDI-ს დაეთმო.
„როდესაც უცხოეთში საქართველოს სახელით გამოდიხარ, ეს არის პასუხისმგებლობა და სიამაყე. კვირეულიდან დავბრუნდით შთაგონებულები, მოტივირებულები და მადლიერები იმ მხარდაჭერისთვის, რაც როგორც სხვებისგან, ასევე ერთმანეთისგან მივიღეთ“.
ფოტოები: adilyusifov
აზერბაიჯანის დედაქალმა 15-17 მაისს Mercedes-Benz-ის სადებიუტო მოდის კვირეულს უმასპინძლა. კვირეულის ერთ-ერთი ორგანიზატორი, აისელ ჰუსეინოვა, ჩვენთან ინტერვიუში ამ ღონისძიების მნიშვნელობაზე, ბაქოს როგორც კულტურული პლატფორმის გაძლიერებაზე და ადგილობრივი დიზაინერების მხარდაჭერის გეგმებზე საუბრობს.
ბაქოში გამართულ Mercedes-Benz-ის მოდის კვირეულის ერთ-ერთი გამორჩეული ნაწილი იყო აზერბაიჯანელი დიზაინერის ნამუშევრების ექსპოზიცია, რომლის კურატორიც დიზაინერი ლეილა იმანოვა გახლდათ. The Diary-სთან ინტერვიუში ლეილა გამოფენის კონცეფციაზე, მის კულტურულ მნიშვნელობასა და იდეის განხორციელების პროცესზე გვესაუბრება.
იტალიური პრემიუმ ბრენდი Harmont & Blaine უკვე დედაქალაქშიც ხსნის მაღაზიას. ჭავჭავაძის გამზირზე მდებარე ფილიალი წარმოგიდგენთ 2025 წლის გაზაფხული-ზაფხულის კოლექციას, რომელიც ხმელთაშუა ზღვის სტილით შთაგონებულია და ნათელი ფერებით გამოირჩევა.
