1966 წლის გარდამტეხი მომენტი იყო ბრენდისთვის, როდესაც Yves Saint Laurent-მა Rive Gauche-ის ხაზით მაღალი მოდა პარიზის სალონებიდან ქუჩაში გაიყვანა. Pre-Fall 2025-ის კოლექცია სწორედ ამ მეხსიერებასა და თანამედროვეობას შორის ამყარებს წონასწორობას.
ენტონი ვაკარელოსთვის მოდა არასდროს ყოფილა გადაჭარბებული ემოციების ან დროებითი ყურადღების საკითხი. ის აგრძელებს Saint Laurent-ის მემკვიდრეობას, თუმცა თანამედროვე შტრიხებით. Pre-Fall 2025-ის კოლექციაში კუბოკრული პიჯაკები აბრეშუმის ქვედაბოლოებთან არის შეხამებული – ვიზუალური დიალოგი, რომლის მეშვეობითაც კრეატიული დირექტორი ყოველდღიურობასა და ელეგანტურობას შორის არსებული საზღვრების წაშლას ცდილობს, თითქოს ტანსაცმელი საკუთარ თავში ატარებს არჩევანის თავისუფლებას.
ვაკარელო არ ცდილობს 1966 წლის რეკონსტრუქციას – ის ამ პერიოდს ახლებური ინტერპრეტაციით წარმოსახავს. აცნობიერებს, რომ ნახევარ საუკუნეზე მეტი გავიდა და ისიც იცის, რომ ქალების ყოველდღიური ცხოვრება დღეს სხვა ტემპით ვითარდება. მოდა, მისი ხედვით, აღარ არის მხოლოდ ოცნებისთვის განკუთვნილი სივრცე – ის რეალურ სიბრტყეზე უნდა იდგეს, თუმცა ამავდროულად ოცნების უფლება არ უნდა წაართვას.
ეს კოლექცია ნოსტალგიაზე არ დგას. ის იმ ვიზუალური კოდების განახლებას ცდილობს, რომლებიც Saint Laurent-ის სახლისთვის ყოველთვის მნიშვნელოვანი იყო – სილუეტის სიზუსტე, თავშეკავებული პროვოკაცია და სტილის სიმარტივე. დღეს ამ კოდების ინტეგრირება თანამედროვე ქალის ყოველდღიურ გარდერობში ხდება.
ვაკარელოს Saint Laurent-ი შორიდან მოპოვებულ აღტაცებას არ ეძებს – ის თავად გეპატიჟება თავშეკავებული თავდაჯერებით, გამოკვეთილი სილუეტებითა და იმ ბუნებრიობით, რომელიც ტანსაცმელს მხოლოდ მაშინ ეძლევა, როდესაც ის ყოველდღიურობის ნაწილად იქცევა. ამ მიდგომას ზუსტად აგრძელებს Pre-Fall 2025-ის კამპანიაც, რომლის ერთ-ერთი სახეა მატილდა გვარლიანი – და არავინ, ისე როგორც მატილდა, არ ირგებს ვაკარელოს ამ თავშეკავებულ ამბოხს.
Louis Vuitton-ის 2026 წლის კრუიზ კოლექციის ჩვენება ავინიონში, პაპთა სასახლეში გაიმართა. პირველ რიგებში გამოჩნდნენ ბრიჯიტ მაკრონი, კატრინ დენევი და ქეით ბლანშეტი. ჩვენებაზე ქართველი მოდელი მატილდა გვარლიანიც ვიხილეთ.
ქართველმა მოდის ბრენდებმა BLIKVANGER და INDIVIDI, მერსედეს-ბენცის აზერბაიჯანის მოდის კვირეულზე ერთობლივი კოლექცია წარადგინეს. მიუხედავად ბრენდების განსხვავებული ესთეტიკისა, კოლექციამ ერთიანობა შეინარჩუნა, რადგან ორივე ბრენდის წარმოდგენილი სამოსი მთავარ თემას –„ქალის ბუნების ცვლილება დროში“ – ეფუძნებოდა.
აზერბაიჯანის დედაქალმა 15-17 მაისს Mercedes-Benz-ის სადებიუტო მოდის კვირეულს უმასპინძლა. კვირეულის ერთ-ერთი ორგანიზატორი, აისელ ჰუსეინოვა, ჩვენთან ინტერვიუში ამ ღონისძიების მნიშვნელობაზე, ბაქოს როგორც კულტურული პლატფორმის გაძლიერებაზე და ადგილობრივი დიზაინერების მხარდაჭერის გეგმებზე საუბრობს.
